Ο δούκας Κρήτης Guido da Canal παραχωρεί στην Maria και την Donata da Chioggia κόρες του Marino da Chioggia δύο σερβενταρίες, οι οποίες ανήκαν στον πατέρα τους και παλαιότερα στον θείο τους Frizerio da Chioggia.

Cum per nobilem virum dominum Iacobum Baroci olim ducham Crete et suum consilium dictum fuisset concorditer et sentencialiter quod due serventarie de suprascripta milicia de ca da Clugia venire debuissent in potestate Marie et Donate de Clugia que habere debebant totum redditum et proventum de quo potuissent leggitime probasse quod provenisset ex dictis duabus serventariis ex quo obisset Frigerius de Clugia et cetera; et si Maria et Donata obligate fuissent per aliquam obligacionem Marchisine de Clugia ad vendendum sibi dictas serventarias nullius fuisset valencie vel valoris et hoc sub pena iperperorum D. Item si dicta Maria et Donata vendere voluerint dictas serventarias, ipsas vendere debeant dando intelligere illud signorum, ut stridari debeant ad hoc, ut fraudem aliquam pati non debeant inde predicte Maria et Donata, et cum suprascripte due serventarie numquam scripte fuissent in catastico comunis prenominatis Marie et Donate. Igitur nos Guido de Canale ducha Crete cum nostro consilio volentes observare sententiam per nobilem virum suprascriptum dominum Iacobum Barocium predecessorem nostrum latam damus et concedimus suprascriptis Marie et Donate de Clugia filiabus quondam Marini de Clugia et suis successoribus prenominatas duas serventarias de suprascripta milicia quondam data da Clugia iuxta formam et tenorem sentencie sepedicte cum habenciis et pertinenciis suis omnibus ac villanis; que due serventarie scripte erant simul cum tota milicia Frigerio de Clugia, ut superius continetur. Ipse vero Maria et Donata de Clugia tenentur eas serviri facere ad beneplacitum signorie. Iuraverunt fidelitatem domino nostro duci, concessionem, varnicionem, manifestacionem et cetera capitula iuxta consuetudinem militum Crete. Actum per manum Gerardi Vido presbiteri Sancti Vitalis notarii, consenciente suprascripto domino Guidone de Canale ducha Crete et eius consilio. Anno Domini MCCCIIIo, mense ianuarii, die XV intrante, indicione secunda. Cancellatum est suprascriptum scriptum, eo quod dicte Maria et Donata de Clugia vendidit dictas suas serventarias Marino Abramo, ut infra continetur.