O δούκας Κρήτης Guido da Canal παραχωρεί στον Nicola Fradello του Giovanni μια σερβενταρία, την οποία είχε αγοράσει από τον ποτέ Stefano Trevisano.

Nos Guido de Canale ducha Crete cum nostro consilio et successoribus nostris notum facimus universis, quia cum recepimus litteras a viro nobili domino Marino Gradonico castellano Coronis et Mothonis, in qua inter cetera post salutem continebatur, quod Gerardinus de Mes conparvit coram ipso cum una commissione, que sibi commissa erat per dominum Iohannem Fradello, et eum requisivit, ut mitteret pro Rialda relicta Stephanini Trivisani de Creta magno tempore habitatoris Corone et inquireret ab ea, si erat contenta de bonis dicti Stephani sibi relictis pro sua repromissa, et quod ad dicti Gerardini peticionem misit pro dicta muliere, que interogata si cotentabatur de ipsis bonis sibi relictis pro sua repromissa, respondit quod contenta erat et cetera, ut in ea continetur, damus et concedimus Nicolao Fradello filio nobilis viri Iohannis Fradello et suis heredibus sergentariam unam de milicia suprascripta, que fuit suprascripti Stephani Trivisani, cum omnibus suis habenciis et pertinenciis et villanis, quam idem Iohannes Fradello pater dicti Nicolai emit a suprascripto Stephano ipso vivente post stridacionem tunc inde factam secundum usum. Iuravit itaque fidelitatem domino nostro duci, nobis et successoribus nostris imperpetuum, varnicionem, obedienciam et cetera capitula concessionis militum. Actum // currente anno incarnacionis Domini MCCCVIIII, mense maii, die XVI intrante, indicione VIIa. Ego Benedictus Saxo notarius de mandato suprascripti domini duche et sui consilii scripsi.