Παραχωρείται στα αδέλφια Bartolomeo, Nicola και Pietro Testabusa μια καβαλαρία στις θέσεις Λουτράκι, Νωπήγια και Καρύδι, την οποία τους είχε παραχωρήσει η μητέρα τους Donata Testabusa

Nos Marinus Baduario milex ducha Crete cum nostro consilio notum volumus fieri cunctis presentem paginam inspecturis, nos a viro nobili Blasio Geno rectore Chanee recepisse litteras continentes, quod cum quedam millicia nobilis mulieris Donate Testabusa habitatricis Chanee, posita in iurisdicione Chanee ad Lutrachi, Nopagia et Charidhi, stridata foret hic Candide et Chanee et nullus camparverit, qui vellet vel haberet aliquid dicere super ipsa, et dicta Donata vellet quod predicta millicia scriberet super filiis suis, videlicet Bartholomeo, Nicolao et Petro, nos rogabat, quatenus predictam milliciam scribi facere vellemus. Quapropter damus et concedimus suprascriptis Bartholomeo, Nicolao et Petro fratribus filiis dicte Donate Testabuxe et eorum heredibus suprascriptam milliciam denominate matris eorum cum omnibus habenciis, pertinenciis et villanis dicte millicie post clamorem inde factum secundum usum Candide et Chanee nemine comparente, ut dictum est. Quam milliciam ipsi tenentur defendere et varnire secundum consuetudinem Chanee. Tenentur eciam de fidelitate domino nostro duci Veneciarum, nobis et successoribus nostris imperpetuum et ceteris capitulis concessionis et capitularis millitum Chanee. Actum anno Domini MCCCXIIII, mense septembris, indicione XIIIe, die XVIo intrante. Ego Egidius de Iordano diaconus Sancti Geminiani notarius de mandato suprascripti domini duche et sui consilii scripsi