Παραχωρούνται στον Marco Darmer τρεις σερβενταρίες στην τούρμα Κισάμου στις θέσεις Παλαιόκαστρο και Σκουτελώνας, τις οποίες κατείχε ήδη

Nos Marinus Baduario millex ducha Crete cum nostro consilio notum facimus universis presentem paginam inspecturis, nos a viro nobili Blasio Geno recepisse litteras inter cetera continentes, quod ibi Chanee fuerint exclamate tres sergentarie Marci Armarii, posite in turma Kyssami in Paleocastro et Scutellona, et nullus comparverit qui diceret super eis et dictus Marcus vellet quod scriberentur Candide super eum, nos rogabat, quatenus dictas tres sergentarias dicto Marco scribi facere nos vellemus. Quapropter damus et concedimus suprascripto Marco Armario et eius heredibus dictas tres sergentarias, positas in turma Kyssami in Paleocastro et Scutellona, cum omnibus ipsarum habenciis, pertinenciis et villanis, post clamorem inde factum secundum usum hic Candide et Chanee, ut dictum est. Quas quidem sergentarias tres ipse Marcus de Armario tenetur defendere et varnire secundum consuetudinem Chanee. Tenetur eciam de fidelitate domino nostro duci Veneciarum, nobis et successoribus nostris imperpetuum et ceteris capitulis concessionis et capitularis millitum Crete. Actum anno Domini millesimo trecentesimo quartodecimo, mense septembris, indicione terciedecime. Ego Egidius de Iordano diaconus Sancti Geminiani notarius de mandato suprascripti domini duche et sui consilii scripsi