Παραχωρούνται στα αδέλφια Marco, Nicola και Lorenzo de Vigna μια σερβενταρία στις θέσεις Κεραμέα, Ακρωτήρι Σπάθα, Γωνιά και Καλάμι, την οποία είχαν αγοράσει από τον ποτέ Matteo Querini

Nos Fantinus Dandulo ducha Crete cum nostro consilio notum facimus universis, quod a nobili viro Andrea Geno rectore Chanee recepimus litteras in hac forma, egregio et potenti viro domino Fantino Dandulo honorabili duche Crete et eius consilio Andreas Geno rector Chanee salutem prosperam et felicem, cum hic Chanee fecimus exclamari publice per preconem, quod si qua persona haberet qui diceret super unam serventariam quondam Mathei Quirino, positam ad Kerameam et ad Pontam Spate, ad La Goniam et ad Calami, quod infra dies quindecim comparere debet cum suis iuribus et nullus comparvit, dominationem vestram precor, ut dictam serventariam ibi in Candida stridari facere vos vellitis, et si aliquis non comparverit qui super ea dicat ad terminum per vos datum, eam scribi facere Marco, Nicolao et Laurencio de Vinea fratribus, qui dictam serventariam emerunt a dicto Matheo Quirino, rescribentes michi, si placet, cum dicta serventaria fuerit antedictis scripta. Datum die penultimo februarii, indicione quintadecima. Quare nos iuxta formam litterarum dicti rectoris hic in Candida stridari fecimus dictam serventariam secundum usum, cuius stride transacto termino et nemine comparente qui diceret super ea, damus et concedimus dictis Marco, Nicolao et Laurencio de Vinea fratribus et suis heredibus suprascriptam serventariam dicti quondam Mathei Quirino, positam ad Kerameam et ad Pontam Spate ad La Goniam et ad Calami, cum omnibus suis habenciis, pertinenciis et villanis secundum formam predictarum litterarum eiusdem rectoris. Quam quidem serventariam ipsi tenentur defendere et varnire personaliter secundum consuetudinem Chanee, et iuraverunt fidelitatem domino nostro duci, nobis et successoribus nostris, capitularis obediencie, concessionem et varnicionem et cetera capitula iuxta usum. Actum anno Domini millesimo trecentesimo decimo septimo, mense iunii, die septimo intrante, indicione quintadecima. Ego Iacobus de Iordano notarius et cancellarius Crete de mandato dicti domini duche et eius consilii predicta scripsi.