Παραχωρείται στον Giovanni Buffono μισή σερβενταρία στην τούρμα Κισάμου στη θέση Πύργος, η οποία ανήκε στην μακαρίτισσα γιαγιά ή θεία του, Antolina Trevisano

Nos Marinus Baduario milex ducha Crete cum nostro consilio notum facimus cunctis presentem paginam inspecturis, nos a viro nobili Blasio Geno rectore Chanee recepisse litteras inter cetera continentes, quod cum Antolina Trivisano quondam habitatrix Chanee dimississet per testamentum nepoti suo Iohanni Buffono dimidiam serventariam, positam in Kyssamo ad Pirgum, ut videre possemus per testamentum predictum, quod dictus Iohannes Boffono nobis mittebat et dicta dimidia sergentaria ibi Chanee foret stridata secundum usum et nullus comparverit, qui diceret super ea, et dictus Iohannes Buffono vellet quod ipsa dimidia sergentaria super eum scriberetur, quatenus dictam dimidiam sergentariam ipsi Iohanni scribi facere dignaremus cum condicione contenta in ipso testamento. Quapropter post clamorem inde factum secundum usum hic Candide, nemine comparente, damus et concedimus suprascripto Iohanni Buffono et eius heredibus prenominatam dimidiam sergentariam cum omnibus ipsius habenciis, pertinenciis et villanis cum condicione contenta in ipso testamento, que talis est, videlicet predictus Iohannes non possit vendere eam vel alienare et quod si ipse moriretur sine heredibus, quod ipsa dimidia sergentaria deveniat in suos commissarios ipsius Antoline ad distribuendum eam pro anima sua, sicut eis videbitur. Quam quidem sergentariam mediam ipse Iohannes Buffono tenetur defendere secundum consuetudinem Chanee. Tenetur eciam de fidelitate domino nostro duci Veneciarum, nobis et successoribus nostris imperpetuum et ceteris capitulis concessionis et capitularis millitum Chanee. Actum anno Domini MCCCXIIII, mense septembris, indicione XIIIe. Ego Egidius de Iordano diaconus Sancti Geminiani notarius de mandato suprascripti domini duche et sui consilii scripsi.